ختيرت - بقلم طانيوس أندراوس

لما شخص بيصير ختيار عمره بيناهز ال80 سنة

لما بدو يحكي عن حالو شو بيقول.

خَتْيَرتْ

الظاهرْ عليّي خَتُيَرُتُ وشَعري شابُ 

هجم عليّ التَعَبْ والهَمْ وجعّدو خْدودي

ورسمو عَ جبيني خْطوط مْن العَذابْ 

ما كانت مِنْ قَبِلْ بَعدها مَوْجودي

والنَظَرْ ما بَقا يْشوف غَيْر ْلِـ قْرابْ 

وصارِتْ النَظْرات لـ بعيد مَحْدودي

صِرْتْ اِرْجَعْ عَ البَيْتْ قَبِلْ لِغْيابْ 

حَتَى ما فوتْ ب طَريقْ مَسدودي

وصِرْتْ لَكِلْ شي اِحْسبْلو حْسابْ 

بخافْ اِمْشي واِتْفَرْكَسْ ب عودي

صارْ التَعَبْ يِمْشي مَعي لـ البابْ

إيدو بإيدي يِضْحَكْ عَ مَجْهودي

صِرتْ إشْتاقْ بالبَْيتْ لِلّي غابْ 

وما بَقا عَمْ اِقْدِرْ اوفي بِوعودي

صِرت اتْذَكَّرْ كتيرْ اِيامْ الشبابْ

كيفْ كنت بهالعمرْ افرض وجودي

ْ كانتْ الصَبايا بالدور تُنْطُرْ عالبوابْ 

صارِتْ الكآبة تفوتْ تَتْنامْ عَ زْنودي

خَتْيَرتْ وصارتْ سنيني كَوْمِة تْرابْ

ومِنْ بَعِدْ كِلْ هالعُمُرْ يلي راح

صارِتْ حياتي بهالعمرْ أيام مَعْدودي

ــــــــــــــــــــــــــــــــــــــــــــــــــــــــــــــــــــــ

بقلم

طانيوس أندراوس

20/8/2015