بيي الشهيد

لما استشهدت يا بيي
زيَّنو جبينك بالأرزة
عزفولك لحن الخلود
حملوك على كفوفن الأبطال
زينو نعشك بالعلم
بس أنا كنت بعدني زغير
ما شفتك ولا عرفتك
ما لحقت اندهلك بيي
ما كنت أعرف شو يعني شهادي
شو يعني موت
شو يعني حياة
شو يعني بي
شو يعني وطن
بس حسيت بدموع امي نزلت عخدي حرقتني يا بيي
كأنها بدا تخبرني شي
كأنها عم بتقللي بيك استشهد افتخر
كأنها عم بتقللي لما تكبر كون متل بيك بطل
وكبرت يا بيي
وصرت متلك جندي مكلل بالشرف والتضحية والوفاء
صرت اعرف قيمة الوطن
صرت اعرف شو يعني شرف
شو يعني ضحية
شو يعني وفاء
صرت اعرف قيمة بلادنا
صرت اعرف مين عدوي ومين صديقي
صرت افهم معنى الإستقلال وشو يعني حرية
صرت اعرف شو قيمة الشهادي
صرت اعرفك منيح يا بيي كأني بعرفك من زمان
صرت شوفك بالعلم
صرت شوفك بالأرزة
صرت شوفك بكل دمعة ام شهيد
صرت شوفك بكل نصر
صرت إسمع صوتك بالنشيد الوطني
كبرت بعيني كتير يا بيي ورح تبقى بعيوني سهران عالوطن
الوطن يلي كل حبة تراب من ارضو مجبولة بدمك
برفع راسي فيك لما بينذكر اسمك
بشوف حالي فيك لما بيسألوني انت إبن مين
بقلن بكل فخر وراس مرفوع انا ابن شهيد قدم حالو ذبيحة على مذبح الوطن تيبقى الوطن وانتو تبقو
بيي استشهد حتى انتو تعيشو وتبقى كرامتكن محفوظة.
يا بيي الشهيد انت وبالسما صليلنا.

طانيوس أندراوس
بكل فخر
ابن الشهيد البطل

بقلم
طانيوس أندراوس

جوا القلب بقلم طانيوس أندراوس

صَرلي زَمان

ما كتبت عنِّك

وقلت القلب عِشْئان

ت َصار الحرف يِنزَل عالورق

مِستحي مِنِّك وخِجْلان

وعَ جبين القصيدي

لِ كتبتها بإيدي 

حتى الحِبر  عِرقان

إنتِ يا عِشْرت عُمر

انت يا احلا قَدَر

يا زهرة شهر نيسان

وبالقلب...

جوّا القلب

بِبَحر حبِّك عايِم وغِرئان

اشتقت عن خدودِك 

شِمْ العُطر 

ومَيِّلْ على المَرج

أُقطف الرمّان

وبعيونِك ... 

إغفا بعيونِك

متل ما بيغفا الورد عالريحان

رجِّع حلم هربان...

حدود حبّي الك

تخطى حدود الحب

وغَيَّر العنوان

مشي ع أحلى درب

وصار مطرحو بالقلب

عنوانو الإدمان

حوار بين الغني والفقير

حوار بين الشاعر والفقير

الغني
البطن شبعان والجيبة ملياني
انا بين الناس سلطان زماني
انا بالمال عم افرض وجودي
بشتري ضمائر ناس جوعاني

الفقير
لا تشوف حالك علينا كتير
ما بحقلك تكون متل الفقير
انت عندك مال بس ما عندك ضمير
ومش مهم تكون ل بطون شبعاني

الغني
شو بينفع الضمير بهيك حالي
الوضع تعتير وكل شي غالي
بقدر اشتري لبيخطر عبالي
شو ما كان الوضع والحالي تعباني

الفقير
مش يمكن مالك يطير متل الهوا
بشي مرض خبيث ما الو دوا
وتفوت التعاسة بعمرك الي ستوى
وصحتك ترجع ل ورا خليفاني

الغني
انا بمالي حامل بإيدي سلاح
ساكن بقصر عايش ومرتاح
مش متلك مقضي العمر فلاح
بتشتغل ليل نهار وتيابك عرقاني

الفقير
انا فقير والفقر مش عيب
الفقر بالعقل مش بالجيب
وغنى الإنسان مش بمالو
بكرامتو وضميرو وحسن أعمالو
وقيمتنا ما بتنقاس ببطون ملياني

مش كل الأغنياء طبعا" 
بس في هيك وكتار للأسف

بقلم

طانيوس أندراوس

سَمَّيْتِكْ بقلم طانيوس أندراوس

سَمَّيْتِكْ 

سَمَّيْتِكْ كل الدني

كل العمر 

كل الكَون

وكل فصول السنِة

سَمَّيْتِكْ عمري

قَدَري 

وقَمَري

ولَ حُبِّك بِنْحِني

سَمَّيْتِكْ نَبَضي 

روحي

وقلبي

ومَشَّيْتِكْ عَ دَرْبي

وقَطَفْتِكْ سَوْسَني

إنتِ الدني

إنتِ الكَون

انت سما 

بأَحلا لَون

وزَهرَة بحياتي

فيها بِعْتِني

بقلم

طانيوس أندراوس

أمي يا ملاكي بقلم طانيوس أندراوس

أمي يا ملاكي

أمي

يا ملاكي

يا سر وجودي

وعطر حياتي

يا نجمة اضاءت

سماء عمري

وقمر أنار فؤادي

كم مرة"

سهرتي

تألمتي

صرختي

خفتي

وكم مرة " زرفتي دموعا" ... 

ورغم كل هذا تحملتي

وناضلتي من اجلي

تسعة أشهر وأنت تنتظرين

بذوغ فجري

متلهفة لرؤيتي

استقبلتني بإبنسامة

بفرح

تنظرين الي بنظرات

تغمرها السعادة

حملتني بين ذراعيكِ

وعلى صدرك الحنون ضميتني

ومن حنانَكِ أرضعتني

وكأنني لم أفعل شيئا"

كأنني لم أكن سبب عذابك

ٱه.... يا أمي

كم تحملتني داخل أحشائكِ... 

تسعة أشهر وكأنها سنين... 

أسأل نفسي؟؟؟... 

هل يستحق وجودي

كل هذا العذاب؟؟؟

أعتذر منك يا أمي

أعتذر من دموعك 

من ألمك

من كل صرخة صدرت عنك.. 

أمي يا ملاكي

لو اجتمعت كل حروف الدنيا

أقرأها أمي

لو رأيت كل ورود الدنيا

أرى وجهكِ أمي

ماذا عسايَ أن أقول

في عيدكِ

فقد اتى الربيع يخبرني عنكِ

بصفائِهِ

بزهورِهِ

بألوانِهِ 

كم هو يشبهك

أحبك يا أمي

أحب حضنكِ الدافئ

أحب قلبكِ الحنون

فهو بيتي ومكاني

أمي يا ملاكي

أنت أروع مخلوق

على وجه الأرض

وأجمل نساء الكون

كل عيد وأنت بألف خير

كل عيد وأنت ملاكي 

يا أمي

بقلم

طانيوس أندراوس

أنا شاعر بقلم طانيوس أندراوس

أنا  شاعر

انا جايِ ورافع بإيدي مَشْعَل الثقافي
وحامل بيوت الشعر كلها على كتافي
وببحر أفكاري عم تِغرق هالحروف
وترجـع تعوم كلمات تِسكن شفافـــي

انا بالشعر عـــم أُفْـــرُض وجـــودي
عَــــمْ حَقِّقْ حِلِمْ ت أوفي بوعـــودي
ورَح ضَل ماسِك قلــم يكتُبْ قصيدي
ما دام في دقَّـــة بقلبي موجـــودي

إجت إيـــد المعرِفِـــة دَقِّـــتْ عَ بابـي
تِتْنَشَقْ حـــروفـــي تِقــــرا بكتابـــــي
ولمـــا يْجِفْ القَلَـــم وتُعْطَش الكِلمـات
بيكــــون حسّو بلحظــــــة غـــيابــــي

ولمّــــــا انـــــا بِكتـــــب قصــــــــيدي
بيــرقُـــــص القلـــــم لـ حـــاملــو بإيدي
بزرع الكلمـــات ع سطوري معانـــي
وبنشرهــــــا عطــــرلمطارح بعيــــدي

وحــــوّا بقلبــــي في إلها مكانـــــة (ي )
بكتبهـــــا بالــــروح بأجمـــــل معانـــي
ولمّـــا بحبر القلب إرسمها بقصيــدي
بتنــــزل الأفكــــار من الخجل عرقانــي

انــــا مــــن الوطــــن ماخــــد شهــــادة (ي)
بتغــــزّل بالعلــــم وبــــــأرزة بـــــلادي
ولمّــــــا حس بـ خطر قــــرّب ع بابــــو
بخــــرطش القلــم وبضغـــط على زنادي

انـــا شاعـــر جنوبـــي عنـــدي رسالـة (ي)
بكتــــب الإحساس لبيخطـــــر عبالـــــــي
بحـــــب الحـــــرف وبِعشَـــــق الكلمِـــــة
وكتابــــة الشِعــــــر كــــانِــــت بحلمـــــي
وبـالقلــــم أرفـــــع إسم لبــــنان بالعالــــي

بقلم

طانيوس أندراوس

يا جنوب بقلم طانيوس أندراوس

مهما يا جنوب عليك تراكمت الحروب

وسهولك نزرعت قنابل ونسدّت دروب

وصارت النيران تحرقلك مباني

ودخان ع شمسك بتولّد غروب

دمّي فداك ولو يوم من عمري بقي

منّك الطغيان بطرد تتبقى يا جنوب

لا تخاف يا جنوب في عندك رجال

خلقو للحرب بالمعركة أبطال

بتواجه الموت بتطرد العدوان

بجبين عالي بقدر ما بينطال

كرمالك هني ما بدهن قصور

بدهن ع ضهر الموت يبنو الن عرزال

مهما يا جنوب عليك امتدّت أيادي

ت شبر من أرضك تاخد زيادي

لا تخاف منها ما منتركها

بقوي وإيمان عزم وإرادي

هالإيد نحنا بقوي منقطعها

وما يروح من أرضك شبر يا بلادي

بقلم

طانيوس أندراوس

عاشق أنا بقلم طانيوس أندراوس

عاشق أنا

عاشق أنا والقلب مغروم

وخدّي الطري اشتاق لمخدي

عشقت السهروالنوم ما لو لزوم

وغير السهرأنا ما بفى بدّي

بدّي بحر أفكار حتى عوم

وع موج الحب إسحبك حدّي

نسهر سوى وبالسما نعد نجوم

ودقات قلبي وحدك تعدّي

بوجودك معي ما بقا في هموم

وما بقا في ايام مسودي

رح ضل فيكي فكّر وما قوم

وتبقى ليالي ايدي على خدّي

بقلم

طانيوس أندراوس

وطن موجوع بقلم طانيوس أندراوس

وطن موجوع

الوطن من جنوبو لشمالو

عم يبكي وَجَع ع شعبو المسكين

عم يتعذَّب ومقهور كرمالو

طعنات بالظهر غدِر وسكاكين

وإيد العمالةِ صارت خيالو

حِمْلِتْ سلاح ورجال مدسوسين

زَرَعو الفِتَنْ وقطَّعوا وصالو

ما هَمُّنْ لا طايفِة ولا دين

وصَوت الرصاص غنَّى موّالو

وناس عم تُهرب شمال ويمين

وصار المَدفَعْ كل ما يحلالو

يفرِّق ناس عن بعض مجموعين

ودخان عم يطلع من قبالو

ونيران عم تِحرق شجر وبساتين

ما عاد الطَّير يسكن جبالو

ولا عِدنا سمِعنا صَوْت حساسين

ريحة الشهادي طُلعت من رجالو

شُهدا عالأرض بالدّم غرقانين

أَجراس الكنايس صَرخِت حبالو

الله واكبر توحَّدو يا مؤمنين

يا رب شيل الحقد وازرع بدالو

الحب والسلام للأبد آمين

بقلم

طانيوس أندراوس

يا حلوي - بقلم طانيوس أندراوس

يا حلوي

يا حلوي القلب شرعلك بوابو

تيستقبلك عندو من أحسن حبابو

فوتي عقلبي وزرعي البسمات

تينسى الأسى والحزن وعذابو

ومن فرحتو قلبي صارت الدقات

تنشد غناني قصص وحكايات

رجعت البسمة وصفيت النيات

من وقت ما انت وقفتي عبابو

ويا حلوي القمر مش دايماً سهران

تينور علينا وعالعاشق الولهان

يمكن يكون الليل مستحي وخجلان

وما بدو بوجودك يلبس تيابو

ولمن بيكون عنا غايب هالقمر

بيقعد على بوابنا يخيم هالضجر

ليش ما بتكوني فوق تيحلا السهر

وتضوّي إنت مطرح غيابو

 ــــــــــــــــــــــــــــــــــــــــــــــــــــــــــ

بقلم

طانيوس أندراوس

تركونا نعيش - بقلم طانيوس أندراوس

تركونا نعيش

تركونا نعيش متل ناس كتار

ما شفنا من الدني غير قتل ودمار

وعينا ع حرب ولعاني

ناس تقتل ناس

وناس جوعاني

وبيوت تحترق

عم تاكلها النار

شو ذنب الطفولة

شو ذنب لزغار

يموتو ضحية طمع

ولعبة كبار

شو ذنب إم فقدت ولدها

بليلة شؤم ما رجع عالدار

شو ذنب ناس بسببكم انتوا

تحدد مصيرها

وانتها المشوار

وانتو يا مسؤولين

يلي المفروض عالوطن سهرانين!!!

فيقو بقا

ليش عالشعب نايمين؟؟؟

ما عرفتوا يلي صار؟؟؟

قتل وخطف

فقر وإحتكار

سمعوني منيح يا رجال السياسي

بيكفينا قهر بيكفينا مآسي

قسّمتوا البلد تقاسمتوا الكراسي

هيدا بدو يكون وزير

هيدا بدو يكون نايب

هيدا بدو الرئاسي

والشعب عم بيموت

وعم تتهدّم بيوت

والظلم قاسي

ــــــــــــــــــــــــــــــــــــــــــــــ

بقلم

طانيوس أندراوس

قصة حلوي وحلم - بقلم طانيوس أندراوس

قصة حلوي وحلم

لَمَحتْ من بعيد

حلوي صبية(ي)
متل الحَجَلْ

عَمْ تِكْرُجْ عليّي
قَرَّبِتْ منّي 

قَرَّبِتْ اَكْتَرْ
وصِرتْ إتْذَكَّرْ 

ان كنت بعرف

مين هالحورية(ي)

وصْلِتْ لَحَدّي 

عيونها بعيوني

تامَّلِتْ فيّي

حاملي معها وردة 

حمرا جوريّة(ي)

مَدِّتْ إيدها 

وبكل ثقة

قَدَّمِتْلي هيّ

وهَوْن عَقْلي طارْ

قلت شو ل صارْ

وشو عِنْدْها نيّي

مَدَّيْتْ إيدي وأَخَدتْها

وعْتَبَرْتْها هديّة(ي)

تشَجَّعتْ وعَزَمْتْها

ت تْروح معي 

عَ شي سَهْريّة(ي)

قِبْلِتْ وتْواعَدْنا 

رُحْنا وقَعَدْنا 

حَدْ نَبْعِة المَيّيِ

حكينا كلام حب

وصارْ يدِقْ القَلْبْ

وقدمتلا زهرة ربيعية

من نَظْرَة لَ نَظْرة

مِنْ كِلْمِة لَ كِلْمِة

ومِنْ بَسْمِة ل َبَسْمِة

حَطِّتْ إيديْها النّاعْمِة بإيديّيِ

وْبِعْيون مشتاقَة

ونَظْرات حَرّاقَة

طَلَبِت منيْ بَوْسِة ناريِّة

فْرِحِت وجَهَّزِتْ حَالي

تَبوسْ شِفِّتْها الطَريِّة(ي)

ومِنْ حَظِّي المْعَتَّرْ

فِقِتْ مِنْ حِلْمِي

طابِعْ شْفافي عالمْخَدِيِّة(ي)

ـــــــــــــــــــــــــــــــــــــــــــ

بقلم

طانيوس أندراوس

شو هالحالة يا جارة - بقلم طانيوس أندراوس

شو هالحالي يا جارة

شو هالحالي يا جـــارة

ساعـــة ناطرة سيــارة

اطلـــع فيهـا أوتوستوب

تمــــا ادفــــع أجـــــــارا

مــا معـي أجرة سرفـيس

ولا أجــــرة أوتوبــــيس

عــم أشّـر متــل البوليس

لــ واقـــف ع الإشــــارة

بالماضي كان فينـا نعيش

بالحاضر صرنا دراويش

عالليــرة نفتـــش تفتيــش

القصّـــة بدهـــا شطـــارا

هيــدا كلـــو مــن الدولار

لـ طالـــع نـــازل منشــار

ولـّــع هالليــــرة بالنــــار

ومجــّـا متـــل السيكـــارا

كيف رح بعيش الفقيـــــر

بهـــالغــلا وهالتعتيــــــر

بعـــد شويـّـة رح بصيــر

يعملو المـــوت زيـــــارة

أشواق - بقلم طانيوس أندراوس

أشواق

كل ما نورك عني غاب

وكل ما طل عليي نور

بنطر تيطلو الأحباب

بقعد  بخاطر مكسور

حتى نكون من بعض قراب

وما نهاجر متل لطيور

بطحنلك عضامي تراب

بعمرلك بقلبي قصور

بفتحلك إيديي باب

بقدملك عينيي نور

بجمعلك من فكري كتاب

دموعي للكلمات سطور

شوقك خلاني بعذاب

وقلبي بعذابك مقهور

كل ما نورك عني غاب

وكل ما طل عليي نور

                                                                                     

يا ريت الماضي بعود

وبرجعنا ولاد زغار

نتلاقى بحب المفقود

الكان غايب عنا مشوار

ونفتح هالدرب المسدود

ومحلو نزرع ورد قمار

ونخلي الحبل مشدود

بيني وبينك في أسرار

ونمحي هالإيام السود

لما خلتنا نشوف نهار

يا ريت الماضي بعود

وبرجعنا ولاد زغار

ــــــــــــــــــــــــــــــــــــــــــ 

بقلم

 طانيوس أندراوس