بتتذكري يا ضيعتي (الجزء الثالث)
بتتذكري يا ضيعتي
مغارة
الزنكلية
فوق
المدرسة القديمة
عالتلة
حد
نبعة المية
يبقو
يجو الزوار
معهن
ورد وغار
صبح
وعشية
يبقو
يضووا شموع
للعدرا
ويسوع
ويصلو
الوردية
ومن
حواليها نحوّش
الزعتر
والسمّاق
وزهرة
العيزقان
وللموقدة
ناخد البلان
بتتذكري
يا ضيعتي
بتتذكري يا ضيعتي
بيت جدّي لكان
ع طريق الجسر
حدّو في بستان
مزروع ليمون وأفندي
حامض ورمّان...
وع جناب الطريق
شجر حور
وسرو وسنديان
وبتتذكري
حيطانو لأكلها الدهر
ألوانو معتقها الزمان
وصوت مدقّة الكبة
بإيد ستّي
لما تنزل
تطحن اللحمة
مع البرغل بالجرن
نزلة الفرسان
وطعمة كبتها
من تحت إيديها
بعدني لليوم
بتحسّر عليها
رماها النسيان
بتتذكري يا ضيعتي
بتتذكري
يا ضيعتي
بياع الكاز
وعربية تجر
حصان مزين بطابات
ملونة بألوان
بالشوارع يبرم ويدور
تيسمعو الناس
يندهلن بالزمور
وبصوتو الرنّان...
وقناديل
...
ونار تولِّع
فتيل...
وبابور وإبرة
وحقن وشحتار
وموقدة معمّرة
بكومة حجار
محاوطة بخفان
بتتذكري يا ضيعتي
القلم
ما عم يرضى يتوقف
والحبركرمالو عم بيزيد
بخبريات ضيعتي بيتثقف
ووراقو العتيقة تندهلو من بعيد
ــــــــــــــــــــــــــــــــــــــــــــــــــــــــ
بقلم
طانيوس
أندراوس
ليست هناك تعليقات:
إرسال تعليق