بتقضٌي حياتك تشتغل تاتعيش
تاتربّي ولادك من عرق الجبين
مصنٌَف بين الناس عالايحة دراويش
ل بتقبضهن بالشمال بتدفعهن باليمين
معاشك بالهوا بيطير متل الريش
بيخلص قبل نص الشهر يا مسكين
عا لقمة العيش مقضي العمر تفتيش
تا تطعمي فواه مفتوحة جوعانين
ساكت وراضي بنعمتك ما بتحكيش
ديونك مكَدٌَسة فوق بعضها بل دكاكين
هيدا عيدك إنت مش لأصحاب الطرابيش
ل عندهن قصور واراضي وملايين
وكل ما أول ايار طل بفكِّر فيك
وبحتار إذا بعيدك يا عامل أو بعزيك
بتعبك لراح عالفاضي كل هالسنين
طانيوس أندراوس
خود مجدك بهالكون يا عصفور
غرٌد وطير وعالسما علٌي
الصياد يلي كان يقلك صباح النور
قاعد ببيتو عايش من القلٌي
بدو سنين تيرجع بعد وشهور
تايشتري الخرطوش ويجمع الغلي
عيش حريتك عالشجر وعالزهور
وتنقلو وما تخافو من حدا يا هالطيور
ما في ولا صياد ناطركن عالتلي
لما طيفِك يا حلوي عا بالي خَطَر
تمنيتِك تصيري معي وتكوني الي
اخترتِك حبيبِة من بين كل البشر
الله خلقِك كرمالي حلال محلَّلي
شفتِك شمس منورة شفتك قَمَر
شفتك عروس مغنّجي ومدلَلي
شفت فيكي عيون بترسم صُوَر
شفت فيكي مرا كاملة مكمّلي
صوتِك همِس عشّاق بلْيالي السَهَر
متل العسكري عالقلب بتتسلّلي
شمَّيت فيكي ورود بأحلى عطر
زهرة ندية بالحب مشنشلي
قلبِك درب طويل ملياني خَطَر
يعني العبارة بالصريح المُخْتَصَر
مش بالسهل انو يكون قلبِك مطرَحي
الفوتي عا قلبِك لازمها جرأة ومَرْجَلي
طانيوس اندراوس
سمعت عنَّك خبر يا عَمّي بكّاني
وخلّى عيوني بالدموع غرقاني
كرجت على خدودي تسأل الأتراح
مين يلي اجا من النوم وعّاني
كنت ناسي الحزن قاعد ومرتاح
لما خبر موتَك يا عمي خلّاني
إنسى الفرح يلي تركني وراح
وعا دنيت الاحزان رجع ودّاني
بعرفَك يا عمي شاعر وفنّان
نَطَق بين ايدَيْك جلمود الحَجَر
وللحرف والكلمة كنت عنوان
بيوت شعرك سكنِت عقول البشر
بعرفَك صاحب قلب كلو حنان
وبفكرك الموزون بتحكي عِبَرْ
وعا اد ما عاملت الطبيعة بإحسان
رح تشتقلك الارض وتبكيك الشجر
بوجودك كان البيت بالفرح مليان
شو كانت معك حلوة ليالي السهر
قضَّيْت حياتك تشتغل شقيان
تتحمي ولادك من الجوع والخطر
ولما كبِرت يا عمّي وصار العمر تعيان
تغلَّب عليك المرض وعيَّاك الكَبَرْ
غمَّضو عيونك تاتقابل الرحمان
وتغيب عن الأحباب لٱخر الدهِر
ومن بعد ما منك كان النظر شبعان
ما بقي منك غير ذكريات وصور
موتَك يا عمي خلى القلب زِعلان
من وقت لعرفت وصَدَمني الخبر
بكيو على غيابك البيت والحيطان
ونزلت عليك دموع متل المطر
هيك الحياة بتنتهي بالاحزان
وبياخدنا الرب عا جنة الإنسان
لما يجي عا بابنا يدق القدر من
الشاعر طانيوس اندراوس
