بدي اتغير بقلم طانيوس اندراوس

 بدي اتغير

قالت بدي اتغيٌَر واقلُب الدفّي

بجسم ممشوق واتحرٌَك بخفٌي

اشتري تياب وإلبس فساتين

واقعد اجر عا اجر ملتفٌي

قالت بدي ارجع حلوة الحلوين

غيٌر حياتي واطلع من القفٌي

قالت بدي ارجع بنت عشرين

وبالفرح باقي العمر رح كفي

همسات ومشاعر

طانيوس اندراوس

اهداء الى روح والدتي بمناسبة عيد الام

 هاي اول سنة  بدونك يا حنوني

هاي اول سنة بعيدك ما بتكوني

هاي اول سنة بكتب عن غيابك

لا بسمعك ولا بتشوفك عيوني

هاي اول سنة بشم ريحة ترابك

يلي بجسدك تحتو مدفوني

هاي اول سنة بييجو احبابك

حتى بموتك لعندي يعزّوني

هاي اول سنة ما بروح دق بابك

حتى صوتك يا امي يسمعوني

هاي اول سنة ما بحسب حسابك

وانطر العيد تا بعيدك يعيدوني

عبالي يا إمي شم ريحة تيابك

حتى لحضنك الدافي يرجعوني

بكرا بتجي الإيام تكتبني بكتابك

ويخلصو سنيني ولعندك يودوني

طانيوس اندراوس

زهقت بقلم طانيوس اندراوس

 زهقت

زهقت ومن هالدني قرفان

لا طعم الها  ولا فرح فيها

قاعد لحالي والفكر تعبان

 كيف بدي حياتي بعد كفيها

عم قضي العمر  بالشغل شقيان

كرمال لقمت عيش اجنيها

واحمي ولادي من نقمة الحرمان

وما خلي البسمة الجوع  يمحيها

صعبة تكون عايش ومش انسان

تفتش عالكرامة وما تلاقيها

وشعب ماشي ببلد مشية الخرفان

وراعي فاشل عم يرعيها

والفقر عشعش بمعدة الجوعان

لقمة خبز ما معو  يشتريها

وناس بالساحات تصرخ وتنهان

وما حدا بكلمة حق يراضيها

من هالوضع هاجرو الشبان

وهوية وطن صار الكل ناسيها

يا ريت الماضي بيرجعلي الزمان

وارجع ايام العز والوفا لاقيها

يا رب مد ايدك فوق سما لبنان

وفتح عيون يلي عالوطن عميان

وارزة الرب باركها وحميها

همسات ومشاعر

طانيوس اندراوس

بيروت بقلم الشاعر طانيوس اندراوس

 

يا بيروت يا ارض القداسي

صوَّرتِك بقلبي وسكًنتك حواسي

انت من شراييني حبِّك بينبَعْ

حرّكتي شعوري وكِل احساسي

ويا بيروت فيكي الحلى بقشَعْ

رغم يلي صار عليكي من مآسي

وبأغاني فيروز إسمِكْ بكل مَطلَعْ

وبكِل سَهرة فَرَحْ فيكي بدِقْ كاسي

بيروت ما بتِنهَزَم ولا بتِركَعْ

بتبقي علم مرفوعة  عالرواسي

ام الدني وكل الطوائِف بتِجْمَعْ

 الياس ومحمد وقاسم عندا سواسي

بيروت عالارض جوهرة بتِلمَعْ

الله مع ملايكتو عليها حراسي

ولمّا خَبَرْ عن بيروت تِسمَعْ

تذَكُّر يا شَعِبْ ان كِنِتْ ناسي

بيروت ما بتِبْكي ولا بتِدْمَعْ

اد ما عليها الزمن كان قاسي

وايد الغَدِرْ لمتَدّت عليها منقطَعْ

منَعْمِلْ مَعْركِة ومنخوضا بشراسي

وتحية لإم الشهيد الي قلبها  تقطَّعْ

عا إبنها لِ راح ضحيّة سياسي

وبيروت بجهودنا وسواعدنا لازم

من جديد باريس الشرق تِرْجَعْ

بقلم

طانيوس اندراوس

اهداء الى كاهن رعية مار مارون عين الدلب

ارجّعِت للناس فرحة عيد

كانت من زمان منسيي

لبست الطفل توب جديد

وقدّٓمت لضيعتك اجمل هديي

ولاد ناطرينك تجي من بعيد

تا من سلتك تعطين عيديي

حامل القربان تسلمن بالإيد

واقف تبارك مباركة سماويي

موكب وناس فرح وزغاىرغيد

رجعتنا لإيام العيشة الهنية

تحديت المرض والكورونا العنيد

بإيمانك القوي والنخوة القوية

يلي متلك قلال وأفكارك فريد

ويلي عملتو لضيعتك مش شويي

طلعت من بين الكل انت الوحيد

حكيت عنك محطات إذاعية

يوم عن يوم محبتنا الك بتزيد

يا صاحب الأخلاق والطلة البهية

انشالله السنة الجاي منعيد سوى

وتبقى بألف خير يا فادي الرعيي

الشاعر طانيوس أندراوس

بمناسبة مرور ٤٠ يوم على وفاة والدتي /اربعين يوم صارو/ بقلم الشاعر طانيوس أندراوس

صار عمرك اليوم بالسما اربعين

وبعدن دموعي عليكي عم ينزلو

الله اختارك معو بين القديسين

توب الملاك عليكي ما اجملو

اربعين يوم مرقو كأنها سنين

اكاليل الزهر عقبرك مش عم يدبلو

قلبي على غيابك بعدو حزين

دقاتو عنك بيضلو يسألو

وينا يلي عطتني حب وحنين

ونظراتها لعندي كانو يتسللو

صليلنا يمي

صليلنا يمي يحمينا  الرب المعين

صوتك صلى بالسما الله حللو

همسات ومشاعر

الشاعر طانيوس أندراوس

رثاء الى أمي

                                                                                                           ٢٢ / ٢ / ٢٠٢٠
لن أنسٓ هذا التاريخ إبدا
فقد خطف أمي وزرع الحزن في قلبي
وأسكت بلحظة قلبها الحنون...
فمعه غابت شمس حياتي
وانطفأ قنديل عمري
فغيابها نار أحرقٓ روحي
في الأمس كانت معنا
واليوم غابت عنا فغاب معها لحن الحياة
أمّاه!!!
كم سأشتاق اليكِ
الى حنانكِ
الى وجهك الأبيض الجميل
الى صوتك السماوي
لن أنساكِ ما دمت حيا"
ستظل شمسك مشرقة في حياتي
أمّاه!!!
أنا أؤمن بأن الله رحوم
فكنت أعلم أنه سيستجيب لصلواتي
كنت اصلي واطلب منه أن ينقذك ويريحك
فارتأى أن الموت هو المنقذ الوحيد
فكان هذا قراره وكانت هذه مشيئته
اختاركِ لتكوني معه في الفردوس
فأنت ملاك مكانك الجنة
فالجنة تحت أقدام الأمهات...
أمّاه!!!
رحلتِ ورحل معكِ كل احساسي بالفرح
وكأنني كنت أفرح لأجلكِ
فكنتِ فرحي وابتسامتي وظِلّ وجودي
رحلتِ وتركتِ غصّٓة في قلبي
دموع تنهمر من عيوني كٓسٓيل من نار
سيبقى رحيلك فاجعة أسكنٓ الألم داخلي
آه يا أمّاه
لو كان البكاء يُجدي لبكيتك الدهر كله
ولكن الحزن أصبح إدماني
آه يا أمّاه!!!
لو تعلمي ما في داخلي...
وكم اتوق شوقا" لحضنك الدافئ الحنون
فكنتِ الأمان والإطمئنان وجوهرة الحنان
والبلسم الشافي وقوتي وقدوتي...
أمّاه!!!
اتذكّر في يوم عيد الأم السنة الماضية كتبت لكِ قصيدة قلت في أحدى أبياتها:
(وبتكتٓر    البسمات  عشفاف  الجميع
وبتجي    النجمات  تاخدلِك    صوٓر)
ها قد اقترب عيد الأم
فماذا أقول لهذه النجوم عندما تأتي وتسأل عنكِ؟؟؟
كيف أفسّر لها غيابكِ؟؟؟
ام ساقول لها انك أصبحتِ نجمة تلمع في سمائها؟؟؟
سيبقى ربيع عيدك يزهر في قلبي محبة وحنان".
امّاه!!!
سامحيني ان قصّرت معكِ يوما"
سامحيني إن خانتك عيوني يوما"
سامحيني ان غبت عنك يوما"
سامحيني إن جرحتكِ يوما"
سامحيني إن خٓرجٓت دمعة من عينِك بسببي يوما"
فأنا خَجِل منها.
ستظل روحك تواكبني في كل مكان وزمان
وسأنتظر هذا اليوم الذي سيأتي لأكون معك وبقربك.
الى ان نلتقي...
اترككِ بين أحضان الله الذي سيجعل روحك الطاهرة ترتاح قرب خالق السموات والأرض
رحمك الله يا أمي... ولروحكِ الطاهرة السلام.
ولدك الحبيب طانيوس

بمناسبة عيد ميلاد اختي الغالية كاتيا نصره شاعرة الأرز

راح العمر بعيدك يهديكي سني

مليانة هنا وبالسعادة مزيَّني

وجايي انا اهديكي كلمِة وفا

وقلِّك يا احلى إخت بي كل الدني

جايي تقلك أدَّيش في بقلبِك دَفا

ونظرة عيونِك بالحنان ملوَّني

وقلبي من حَنانِك بعدو ما كتفا

زيدي حنانِك عقلبي وبعد تحنَّني

إنتي بحياتي نبع من ميِّة شَفا

بروحِك الحلوي يا اختي بتجنِّني

زهرة نديّي كل الطبيعة بتعرفا

احلى من زهرة الياسمين والسوسَني

قلبك يا كاتيا من جوا حب وصفا

كيف ما بدك بهالقلب بتتفنني

شاعرة أرز ما قدرت الغربة تخطفا

بتعطي الوطن من قلبك وما بتمنِّني

لو طلبِت عيونِك نوم بقدملا الغَفا

وبخلي الحلم لعندك يروح وينحِني

رح ضَل خيِّك وسراجي بعدو ما نطفى

وانشالله كل شهر كانون متل هاليوم

ودِّع معِك سنة واستقبل سني

همسات ومشاعر

الشاعر طانيوس أندراوس

رائحة الماضي الجميل

تنشقت رائحة" أنعشت ذاكرتي 

فأعادتني الى حيث أتمنى دائما أن أعود ...

الى طفولتي ... 

الى حضن أمي الدافئ الحنون..  

الى قريتي الصغيرة .... 

الى بيتي القديم ... 

الى لعبتي المكسورة...

الى أرجوحتي المعلقة...

الى بيت جدي ...

الى مدرستي القديمة ... 

الى مقعدي ...

الى أساتذتي ومعلماتي...

الى رفاقي ورفيقاتي ....

الى وطني المسالم ... 

وحين عدت الى صوابي 

أيقنت أنها رائحة الماضي الجميل.

همسات ومشاعر

طانيوس أندراوس

يئسان / بقلم الشاعر طانيوس أندراوس

بهالهمسة عم إحكي عن حالة بيعيشها شخص يئسان من هالحياة بسبب ظروفو الصعبة

بيقول

حاسِس كأنّو هالعمر عم يخلص

وشمعِت حياتي دابت ورح تنطفي

وكل ما زاد عمري سنة سنين عم ينقص

والشعر الأسود عن راسي عم يختفي

وصارت حياتي متل مسرح ومَرقَص

قاعد أنا وحالي عايش بي عالم خَفي

 صارت قيمة البشر كل يوم عم ترخص

بزمن ما فيه لا مخلص ولا صدبق ولا وَفي

همسات ومشاعر

طانيوس أندراوس

بمناسبة وفاة الشاعر غازي حجل

زعلت عليك حروف الأبجدية
لما اجا الموت سكر كتابك
يا صاحب الأخلاق والطلة البهية
نزلت دموع الكل عا غيابك
خسر لبنان قيمة ثقافية
كانت المنابر تحسب حسابك
سجدت لموتك الأرزة الأبية
نخت من اليوم تبوس ترابك
كان خبر موتك صدمة قوية
تليقتو انا وكل احبابك
نزلت عليك حروف منا عادية
ركعت وصلتلك صلاة مريمية
ورشت البخور عا بابك

همسات ومشاعر
الشاعر طانيوس أندراوس

قصيدة اهداء الى شاعرة الأرز كاتيا نصره

لما عا جمهورك يا شاعرة الأرز بتطلي

بتزرعي البسمات عا شفافن وبتخلي

نظراتن عليكي ما بتشبع النظرات

تا عيونن حلى من عيونك تملي

وكل ما قلتي من الشعر ابيات

بيوصل كلامك صلى للناس تتصلي

وكلما منك منسمع منك الهمسات 

صدى صوتك لفوق عالسما يعلي

ويرجع صداها تبعتو النسمات

حامل رسالة من القمر فيها بيقلي

قلك عن لسانو إنك نجمة السهرات

وبنورك  عالإرض مطرحو بتحلي

شو شتقنا نقعد معك نحكي خبريات

تحكي معنا وتمزحي وتقولي يا دللي

بإسم جمهورك وبإسمي انا بالذات

بقلك تعي عالوطن وبالوطن ضللي

وحتى يا كاتيا تبقالنا الضحكات

لازم لما ترجعي ما بقا تفلي

طانيوس أندراوس

بمناسبة وفاة زوجة خالي

بهيدا اليوم 

ضاعت الكلمات وتخَرْسَنْ الحكي

ومد ايدو الحزن ل عنا وغمرنا

وصارت الافكار مشتتي ومشربكي

لما بيخبر موتك يا غالية الموت خبَّرنا

وعيون غرقاني ببحر من دموع وبكي

ولفنا الزعل عا غيابك وبموتك تأثَّرنا

هيدا القدر والرب اختارك تكوني

عا عيد الأم معو لانك حنوني 

قلب كبير وحضن دافي الموت خَسَّرنا

حتى الوطن يكبر

حتى الوطن بشعبو يكبر

وتزيد المحبة بقلوبنا اكتر

لازم المسلم يصلي الأبانا

والمسيحي يقول الله واكبر

لازم كل غني يساعد فقير

ينام الحقد ويفيق الضمير

وعا درب التواضع لازم نسير

وما لازم عا بعضنا نتكبَّر

لازم نكون مع بعض متحدين

اسلام ودروز كلنا ومسيحيين

لا طايفة تفرقنا ولا يخلفنا دين

وما نترك كرامتنا بالذل تتغبَّر

من عرق جبينا لازم  نعيش

ما نخجل تكون من بين الدراويش

ما نطمع نّام عا مخدة من ريش

ما لازم عا لقمة العيش نتجبَّر

ما لازم نلبس تياب الذل

ونشلح تياب الكرامة ونفل 

نعادي الناس ونزعِّل الكل

وكرمال المصلحة نتغيَّر 

لازم نخلّي الوطن منصان

نحفظ ونصون كرامة الإنسان

ونتحلّى بالصبر والإيمان

هيك الوطن فينا بيتعمَّر

همسات ومشاعر

طانيوس أندراوس

بمناسبة عيد ميلاد صديقتي فاديا

عجَنْت الحرف بالمعنى وصفَّيْت القوافي

وكتبت فيكي بيوت من شعر دافي

تا كل سنة بهاليوم اهديكي قصيدي

ووَعّي فيكي عام عا سرير العمر غافي

ونضَوّي معِك شَمْعِت سنة جديدي

وشَمْعت سنِة راحت تطفيها بلطافي

وتتمني الفرح وقت لّي بتريدي

ونطلبلك من الرب يعطيكي العوافي

ومهما كانت الأحلام عنِّك بعيدي

اختصرتي  الوقت وقرَّبتي المسافي

وياسنة تعي بكل سنة بتموز عيدي

وضلِك بعمرها سنين عاطول زيدي

تا ارجع من جديد اعجن حروفي

وإكتبلها  قصيدة بكل قلب صافي

همسات ومشاعر

طانيوس أندراوس

بمناسبة وفاة الكاردينال ما نصرالله بطرس صفير

يا حامل بإيدك مسبحة وصليب

وراكع صوب الرب تتصللي

عا وجك نور يسوع الحبيب

من نبع إيمانك الناس بتمللي

مش هينة علينا يلي متلك يغيب

ويترك فينا حزن وعالسما يعللي

لبنان على غيابك كلو كئيب

أرز الرب والعلم والجبل والتللي

هلق صرت من الله اكتر قريب

وعا عرش القداسة صرت متجللي

المسيح قام

همسات ومشاعر

طانيوس أندراوس

حامل الأمانة

الى مختار بلدة عين الدلب الأستاذ مارك الحاج

حملت الأمانِة وَعِد ومشيت

دَخَلت قلوب الناس لما جيت

حطيت بجيبتك الختم والمحبرة

لبست توب الوفا ونزِلِت عالمَختَرة

تتحافظ عالأمانة وبوَعْدَك وفييت

روح يا مارك اسكن عَرينَكْ

 رمز الوطن مرسوم عا جبينَك

ارز الرب واقف على شمالك

وعلم لبنان يرَفرِف عا يَمينَك

روح يا مارك امشي مَخْتَرة

وتغنَّى بجَمالك ودَلالك

إجا على قياسَك تَوْب المَخترة

اشتَرَيتو بأخلاقك مش بمالك

دربَك طويل بمسافات مسطَّرة

نحنا معك ما بتمشي لحالك

بجيبتَك اليمين الختم والمَحبَرة

وحامل دفاتِرنا أمانِة عا شمالك 

همسات ومشاعر

طانيوس أندراوس

يا نسر عين الدلب

 الى رئيس بلدية عين الدلب الأستاذ داني جبور

يا نِسِر عين الدلب 

حلّق،  علّي،  طير

ومِد عا وسع السما جناحَيْك

ومتل ما بتغمر الإم طفلها لزغير

هيك غامرنا يا ريٌس بإديك

وقلبك متل الوطن قلب كبير

سايع الكل  وجامِعنا حواليك

بإيدك سيف الحق انت الأمير

حاطتنا بقلبك وبعينيك

ولما يسألو وين الوفا... بتصير

أيادي الناس كلا اتدل عليك

ولما يا ريّس ع قلوبنا دقَيْت

حتى تفوت وتاخد مطرحَك

هيدا بيتك والك صدر البيت

كل احترامنا ومحبتنا منمنحك

متل النبض بقلوبنا حليت

وكل الدقات دقتلك الك

وعا اد ما هالوطن يا ريس حبيت

صارت سما لبنان وأرزاتو بتشبهك

همسات ومشاعر

طانيوس أندراوس

ما في وفا

في ناس عندهم خيط الوفا مقطوع

وشمس المحبة من قلوبهم مطفيّي

خبز الحقيقة صار ميِّت من الجوع

وتياب الشرف عا جسمهم مجويّي

لسان الصدق مختفي ومبلوع

الحقيقة عا أرض الكذب مرميّي

جرح الكرامة عم ينزف وموجوع

ورايات الحق منكَّسي ومنسيّي

درب المودّي عندهم صار طلوع

وزهرة حياتهم من العمر مستحيي

وقمح التضحية بالوحل منقوع

وعا نار الكره طبخات مستويّي

صار الحب بقانونهم ممنوع

ولو نكتب عنو بكتب سماويي

متل المرض صارت هالناس تفوع

تصارو بين البشر أمراض معديّي

بقلم
طانيوس أندراوس

على غيابك/ بقلم طانيوس أندراوس

على     غيابِك      كرجت      الدمعات

ونزلِت       نار     حرقت       خدودي

وعلى    شفافي    بكيت    الضحكات

وصار      العمر     ينكر         وجودي

وصارت   البسمة     تنده      النهدات

راح     الفرح       ودبلت       ورودي

وقف      قلبي    وسكتت      الدقات

وصارت شرايينو من القهر  مسدودي

وكل ما عالارض    إسمع     الدعسات

بقول رجعت الحلوي تتنام  عا زنودي

وحتى   بحياتي ما يكون في    آهات

لازم      تكوني     يا   حلى     عمري

 كل     العمر      حدّي       موجودي