همسة شوق

اشتقت فيق عالصبح بكير

نعمل سوى احلى صبحية

نشرب القهوة عا زقزقة لعصافير

وعا صوت فيروز بأحلى  غنيي

وشو شتقت لصوتك   لما يصير

يصرخ بإسمي وينده عليي

ولما ريحة القهوة صوبي اتطير

شوي شوي يفتحو عينيي

وبسرعة قوم إنزل عن السرير

ولاقي الركوة جاهزي ع صينيي

عليها فنجانين وعلبة  سواكير

وما تقبلي تشربي الا  اذا انا

سكبتلك الفنجان بإيديي

همسات ومشاعر

طانيوس أندراوس

هيك هي الناس

في ناس بتضحكك        و ناس بتبكّيك

في ناس بتعلى عليك     وناس بتعلّيك

في ناس بتحبَّك            وناس بتعاديك

في ناس بتحسدك         وناس  بتهنّيك

في ناس بتغدرك           وفي ناس بتحميك

في ناس بتزَعلك           وناس بتراضيك

في ناس بتتركك           وناس بتخلّيك

في ناس بتزعَبك           وناس بتلفّيك

في ناس بتمننك            وناس بتكافيك

في ناس بتسرقك          وفي ناس بتعطيك

مي ناس بتاكلك            وناس بتطعميك      

في ناس بتبيعك            وفي ناس بتشتريك

في ناس بتوقعك           وناس بتهدّيك

في ناس بتلومك            وناس بتراعيك

في ناس بتزهقك           وناس بتسلّيك

في ناس بتخوفك          وناس بتنجّيك

في ناس بتشَلحَك    وفي ناس بتكسيك     

هيك هي الناس            اصناف وأجناس

بأخلاقها بتنقاس           في يلي بيخاف عليك

                  وفي يلي بيغدر فيك

عم تشبهي فصول السنة

شو صرتي عم تشبهي فصول السنِة

من بعد ما تخطَّيتي عمر الولدني

شو صرتي عم تشبهي فصل الصيف 

لما القمر بالليل بي ضَوّي الدني

شو صرتي عم تشبهي فصل الربيع 

لما يفرش الأرض أزهار ملوني

شو صرتي عم تشبهي فصل الخريف 

لما الغصن يشلح عا زهور السَوْسَني

شو صرتي عم تشبهي فصل الشتي 

لما أرز الرب بالتَّلج تبقى مزيَّني

شو صرتي عم تشبهي فصول السنِة

همسات ومشاعر

طانيوس أندراوس

همسة غزل

معدَنِك اتقل من الدَّهَب والياقوت

ويلّي متلك ما بيتلاقو ببيوت

ما في بجمالك هون

ولا بكل الكون

لا بجبل لبنان 

ولا بالشمال 

ولا بالبقاع 

ولا بَّيروت

انت الوطن كلّو

وللوطن رح قلّو

كرمالك بعيش

وكرمالك بموت

ولما صوتِك بيطلع

ما بتسمعو الناس

صوتك بتسمعو الروح

وعالقلب بيفوت

همسات ومشاعر

طانيوس أندراوس

صار عمرا فوق الستين

صار عمرا فوق الستّين

وبعدا بتزبِّط حالا

بتعمل شعرا كرياتين

وحاطا لمرايي قبالا

بدا تبين بالعشرين

اصغَر من إمّا وخالا

وبدا تنافس الحلوين

وتتباها بي جمالا

بتمشي مشيت مغرومين

وتتمخطر بي دلالا

بدا تلبس فساتين 

الله يساعد رجالا

عم يتحمل المسكين

جهلها وشو عا بالا

نادي وريجيم وبيسين

وتصرف عا جسما مالا

بتطلَّع بالموجودين

ما شايفة غير خيالا

كتر ما حطت تلوين

صارت بتشبه شاهين

وبعدا بتزبِّط حالا

همسات ومشاعر

الشاعر طانيوس أندراوس

بعدك وفية

يا متعلقة بهاك الغصن بعدك وفيي

مش متل رفقاتك لي هجرو لغصون

كنتي عا حضن امك زهرة طرية

وكان بعدو اسمك زهرة الليمون

تا صرتي بهالعمر فواكه نديي

ربيتي عالغصن عالحضن الحنون

انت بالغذى فواكه غنيي

بتداوي المريض وبتشفي لعيون

الله عمل منك لوحة فنية

ما لاقو متلك بي كل الفنون

وحدك بقيتي صامدة وقويي

تتعلمي الناس كيف الوفا بيكون

همسات ومشاعر

طانيوس أندراوس

بمناسبة عيد ميلاد ابنتي

زهَّر ربيعك عمر بأحلى سنين

وزرع ايامك حقل كلو ورود

وعطاكي قلب مليان حب وحنين

وخلى وجودك بهالدني احلى وجود

صرتي صبية وصار العمر عشرين

تكحلو عيونك وتلونت لخدود

انت بعيوني حلوة الحلوين

حبي الك يا مارو مالو حدود

وكل سنة بهاليوم معك موجودين

تنعيد ونفرح  بعيدك الموعود

جينا حتى معك نحتفل بالعيد

نضوي شموع وشموع نطفيها

نستقبل سنة جديدة بيوم جديد

وشجرة العمر فرح تسقيها

وتزرعي الايام بالسعادة عناقيد

حتى بكل سنة متل هاليوم تجنيها

ويبقى الحزن عنك مسافة بعيد

تبقى حياتك قصيدة هنا تغنيها

يا رب خود من عمري وبعمرها زيد

حياتي وعمري وروحي  بعطيها

فرحة وجودي بهالدني انتي

وسر السعادة  الله عاطيكي

نفخ فيكي جمال حتى تكوَّنتي

وزرع بقلبك حب حتى يكفّيكي

عيوني بتلحقك وين ما  كنتي

بخاف عليكي من الهوا يِئْذيكي

تصرتي بحياتي العمر يا بنتي

رب السما والكون يحميكي

يا أجمل النساء

همسات في الحب 💓💓💓

كم أحبُّك

كم أعشقُك

فأنتِ الماء ْوالهواءْ

أنتِ الجمالُ والكمالُ

وكل هذا البهاءْ

أنتِ في نهاري

الشمس والدفئ والضياءْ

وفي ليلي

أنت القمرُ والسهرُ 

وحديثُ المساءْ

أنتِ في كِتابي

كل المعاني 

في حروف الهجاءْ

وفي سقمي

أنت البلسمُ وأنت الشفاء

فمعًك لا تعبٌ  ولا سقمٌ

فأنت الدواء

انتِ كل فصول السنة

الصيف والربيع 

والخريف والشتاءْ

أنتِ في عيوني 

دمعة اسيرة الفرح والبكاءْ

غيابك عذابٌ

أكبر من هذه الدنيا 

وسع الفضاءْ

كم أحبّكِ

كم أعشقكِ

يا أغلى امرأة على قلبي

يا أجمل النساءْ

ـــــــــــــــــــــــــــــــــــــــــ

طانيوس أندراوس

الوصايا العشر

من صفر التكوين كانت البداية

الله على الارض نزل وصايا

تتكون طريق النور للايمان

ونعيش الحياة ما نعمل خطايا

اول وصية

 انا هو الهك خالق الأكوان

ما الك اله غيري بالخفايا

تاني وصية

ما تغَطّي عمل شنيع بالحلفان

وتحلف كذب ب الله العطايا

تالت وصية

 عامل امك وبيك بالاحسان

هني ربوك وعطيوك الرعايا

رابع وصية

 روح بيوم الرب قدس القربان

حتى من الله تنال العنايا

خامس وصية

 لا تكذب وخليك طاهر اللسان

وتتبرر كذبك بتأليف الحكايا

سادس وصية

 ما تقتل يا انسان خيك الانسان

وتنهي بإيدك ارواح البرايا

سابع وصية

 ما تزني بلحظة ضعف ايمان

وتخلي شهوتك تئذي الصبايا

ثامن وصية

 ما تمد ايدك وتسرق شو ما كان

وتروح تاخد من الناس الجبايا

تاسع وصية

 ما تشهد زور بضميرك التعبان

وتظلم حدا ما ارتكب جنايا

عاشر وصية

 ما تخدع قريبك بشهوة النسوان

وتشتهي حلالو بسوء النوايا

هيدي الوصايا العشر يا اخوان

نزلت علينا من الله هدايا

حتى حياتنا نعيشها بأمان

ونحسب حساب ايام المنايا

وما تكون اخطاءنا يوم بالحسبان

وما تتكاثر علينا متل الخلايا

وما نكون فوارس ضارية بالميدان

ما ننسى انو العمر في الو نهايا

بقلم

الشاعر طانيوس أندراوس

الى ابنتي مارو

بنتي     احلى       صبيّة      بهالدني

زهرة  حلوي   عمرها عشرين    سني

ربَّيتا     عا    ايدي  وكانت    الطفلة

تصارت    بهالعمر    والعمر       غفلِة

غمرتا    بعيوني      وفيها      بغتني

زرعتا      زهرة     بحقلة      سنيني

سقيتا حناني كل عطفي     وحنيني

قلا يا روحي ويا عمري ويا تقبريني

تكبرت   وصارت   متل    السوسني

ولما  عن شفافي تختفي    البسمي

والوجع   يهجم ويضرب   بجسمي

بتجي    لعندي  بوجي     مبتسمي

تخفف    عني    وتسأل     شو بني

يا رب    من العمر   زدلي     سنين

تا شوفا    عروس وحلوة  الحلوين

وعريسها   يلي   طل   متل  الأمير

عا  حصانو الأبيض ياخدها ويطير

وشوف  السعادة    قدامها   تنحني

همسات ومشاعر

طانيوس أندراوس

                                              31/8/2018

الصورة

علَّقت    صورتِك    عا دفتر  الأشعار

مَطرَح     ما حدِّك     كاتب  قصيدي

زعلِت    حروفي      وصارِت    تغار

وكَتْبِت   عا   آخر    السَطر   تنهيدي

اتَّفَقو   عليكي  وعنك   الفو     خبار

تا  يشَوهو   الصورة   وشيلا  بإيدي

تجمَّعو   حواليكي   وصارو      كتار

وانتِ    بالوسط    صرتي    وحيدي

حروف الحب   رسْمت قلب  من نار

فكرون  يحرقوكي   بحبّي   شَهيدي

وحروف  الحزن   جابِت   دمع  قهّار

فكرون  يغرقوكي  بدموعي الفَريدي

لكن    انت   رغم   كل   يلي     صار

ضلَّيتي    قوية   وبقيتي      عنيدي

ما قبلتي   تتنازلي     عنّي   ولا نهار

ما همِّك حروفي تحملتي    المَكيدي

لكن   انا     رَح    افضح      الأسرار

وخبِّر    حروفي    انك بي    وَريدي

وغير   صورتِك   ما    عندن    خيار

يا بيقبلو    بالصورة    تبقى    معلَّقة

يا رح علقلك كل يوم صورة جديدي

    

الشاعر طانيوس أندراوس

                                         29/8/2018

ما تكون مدمن

ماتكون مدمن عا شرب الكحول وتِسْكَر

وتمشي عالطريق تتمرجح شمال  ويمين 

وتضَيِّع    طريقك     وما      بقا    تتذكَّر

لوين    رايح    ونسيان     إنت       مين

وتشوف   صديقك     عدوَّك         وأكتَر

وتخسرو    بلحظة     طيش     سكرانين

بتضلَّك   كل    الوقت     متل    المهَسْتَر

تتهجم     عالناس      بإيدك       السكّين

ويمكن تكمشك شي يوم دورية   العَسْكَر

يجرّوك    عالسجن      وتضلك    سجين

وصحتك   من    كتر    الشرب       تتأثر

بتْقَضّي كل حياتك    مرضان      وحزين

وكل البواب  المفتوحة  بوجَّك   بتتسكَّر

وبتصير   منبوذ    عا لايحة    المنبوذين

لازم     تتخلَّص    من   السكر   وتتحرَّر

تما يضيّع  عمرك  من الشرب يا  مسكين

همسات ومشاعر

طانيوس أندراوس

حوا وعمرا

   حوا بتستحي    تقول    عمرا
لو   صارت    بالحياة    مختمرا

وتاتخفي  هالعمر وتبين    صبية

بتتبودر وبتتكحل وبتحط حمرا

بتضل     تطلب   السهر       ليلية

بإيدها   كاس   وبتشرب   الخمرا

لو  صارت  بالعمر  ستين  وشوية

بيضل     قلبها      مولِّع    الجَمرا

بعدو     بينبض      بدّو      حنية

مشتاقة   للبوسة     مع     الغمرا

ما بتكبري

كبرناكوراح العمر  شار

اخد     معو        سنين 

وجاب                سنين

وإنتِِ بعدك متل ما انتِ

ما    بتكبري تخمين؟؟؟

ما بتكبري

تخميـن    العمر غافي بعيونِك  وسكران

دايخ    من حلاكي ما  عدَّلك       سنين

يمّا فصل      الربيع      وّرَّتِك      نيسان

بتغيبي  وبترجعي    مع  زهرة الياسمين

يمّا   اجا الوقت  وَقَّف   فيكي     الزَمان

وجَمَّدِك    صبيّة        بالعمر     للعشرين

يمّا إنتِ     عند الله ملاك   مش   إنسان

نَفَـخ فيكي الخلود وحطِّك مع الخالدين

وتا    يبقى   بهالعمر    للحلى      عنوان

نصَّبِك   إلَهة   خالدي   للحلى عالحلوين

همسات ومشاعر

طانيوس أندراوس

معلمتي

من بعد كل هالعمر بمعلمتي تلاقيت

اتطلعت فيها وفتللي راسي

ما بعرف شو صرلي وقتها حسيت

قلبي ضرب للرقم القياسي

ردتلي حنيتي وللمدرسة حنَّيْت

رجعتلي الماضي وتحرَّك حماسي

وخطر عبالي العلم وتمنِّيْت

إرجع من جديد عا مقعد دراسي

ورجعـــــت لا وَرا بالافكــــــــار

لمقعــــدي وطاولتــي وكتابــُـــي

لما كنت قوم تا سمع الاستظهار

اوقـــف وايديي يتخبو بجيابــي

تقلُّــي وقـــــاف منيــُح يا قهّـــار

احسن ما إزعَـل وفرجيك عقابـــي

وانــا منهـا بستحي وقبالها بنهـار

صار يكِدنـي العــرق ويبلِّـل تيابــي

تخــرسن لساني قدّامهــا وحتــار

وصـار حضـُوري بيشبـه غيابـــي

رجعت لمطرحي عا مقعدي الختيار

فقت من الحلم ورجعت ل صوابي

ومــن بعـد ما خبرتكــن شو صــُار

ومن بعد ما قرّب يخلص المشوار

تمنيـــت ارجـــع شوفها شي نهـار

جايــي لعنـدي تدِق عـــا بــابـــي

بقلم 

طانيوس أندراوس

غول المال

لما   مالك بتستعملو   بالشكل   الصحيح

وبتصرفو عا مستقبل ولادك   ومستَقبَلَك

وبتمشي   عالخط المستقيم وما   بتزيح

وما    بتصرفو   لغاية  غلط     تا يشقِلَك

وبتعمل   متل   ما   قال السيد  المسيح

ما تعبد   ربين   هو   رب   واحد     الك

وما بتطمع بمال كتير تتصير فوق الريح

تا الناس   تحترمك     لغناك     وتتقبَّلك

بتكون    عملت   بحياتك   شي    منيح

وما   تركت غول المال  عالنار   يوصِّلك

الدني دولاب / بقلم طانيوس أندراوس

هالدني       متل      الدولاب
مرة    هيك     ومرة     هيك
بلحظة   ما بتحسبلا  حساب
فجأة    تلاقي حالك      بَيْك

مرّات       بشوفك        فقير
عايش   حالة   صعبة    كتير
مرات        بشوفك       أمير
بثروة   هبطت فجأة    عليك

مرّات       بشوفك     مديون
سارح   عم  تحسب    لديون
مرات      بشوفك       بتكون
ماشي    وحراس     حواليك

مرّات      بشوفك      عرقان
راجع   من   شغلك      تعبان
فجأة      بشوفك    جنتلمان
ما   بتعمل  شغلة     بإيديك

مرّات      بشوفك    درويش
بشغلك  عم  تاخد    بقشيش
فجأة بشوفك Très Riche
المصاري     عميت    عينيك

هيدا       دولاب      التغيير
لما    يبرم     بدو       يصير
الفقير      مطرح        الغني
والغني      مطرح        فقير
ما بتعرف راسك من اجريك
هالدني    ةصار        دولاب
مرة    هيك   ومرة      هيك

ورقة يانصيب

حبَّيْت  جرِّب   حظي     بورقة   يانصيب

قلت    يمكن     هالمرة    حظّي    يصيب

من      بيّاع    الحظ       ورقة    شتريت

وقلت انشالله   اربح  وظني   ما   يخيب

اخدت     الورقة       ورجعت     عالبيت

تا يجي يوم  السحب   بالوقت   القريب

ويا ليلة   لما نمتها   من كتر   ما   تمنَّيت

صار   فكر   ياخدني    وفكر      ويجيب

شو     طلبت  وقتا   من  الله    وصلَّيت

وشو رسمت  عا صدري اشارة   الصليب

مليون   مرَّة    قلت     كلمة      يا ريت

ومليون  مرّة   ذكرت   يسوع   الحبيب

صرت اسأل حالي معقول   اذا   غْتَنَيت

اتكبَّر   وشوف صديقي   متل   الغريب

مدري   كيف غفيت وقتها وما  حسَّيت

وشرقت عليي الشمس من بعد المغيب

صرت   بعيوني   راقب   ساعة  الحيط

ناطر    وقت السحب ويبرمو  لدواليب

صرت    ناطر    بهاليوم ينتهي  هالنهار

ويبدا    السحب    تا اعرف      الارقام

ولوقتها    بلشت     تدور        هالافكار

معقول    يبرم    معي دولاب    هالايام

وعيشتي    تتغير     ويبلش    المشوار

وورقتي     تربح    وتتحقق     الاحلام

صار   وقت   السحب   وجَهَّزت   حالي

عاشاشة    التلفزيون    مركِّز     عيوني

ورقة     الياناصيب   حطَّيتها     قبالي

ايدي     عقلبي      وافكار       مجنوني

اربح      الجايزة      وغنّي         موالي

وتصير      كل   الناس   بيك   يسموني

ولمّا    برمت    الدواليب خابت   آمالي

ولحظي     النحس    ارقامي   خانوني

أشواق

كــل ما نورك  عني  غــــاب     

وكـــل ما طل  عليي نــــور

بنطر  تيطلّـــو   الأحبـــــاب    

بقعد.   بخاطــــر     مكسور

حتى نكون من بعض  قراب   

وما نهاجر متــــل لطيـــــور

بطحنلـــك عضامـــي  تـراب   

بعمـــرلك بقلبـــي قصــــور

بفتحلــــك إيديـــّـي  بــــاب   

بقدملــــك عينيــّـي نـــــور

بجمعلك من  فكري  كتـــاب   

دموعـــي للكلمات   سطـور

غيابــــك خلانـــي  بعــذاب   

وقلبي.  بعذابك مقهــــــــور

كل  ما نورك  عني غــــــاب   

وكل ما طل عليي  نـــــــور

يـــا ريـــت الماضي بعــود.    

وبرجعنــــا ولاد زغــــــــار

نتلاقــــى بحب المفقـــود.     

الكـــان غايب عنــا مشوار

ونفتـــح هالدرب المسدود     

ومحلـــو نزرع ورد قمــــار   

ونخلـــــي الحبـل مشدود.     

بينــي وبينـك فــي. أسرار

ونمحـــي هالإيــام السود.     

لمــا خلتنا   نشوف   نهـــار

يــا ريـــت الماضي بعـــود     

وبـــــرجعنــــا ولاد زغـــار

___ طانيوس أندراوس _

مشوار

تَرَكوني وراحو مشوار

عالحقلة تا يتغدّو

ما حسَبو حسابي ولا نهار

وقالو هالزلمي بدّو

فجأة طلعو بهالقرار

وعنّو ما عم يرتدّو

قاعد لحالي بهالدّار

وساعاتي عم بيعدّو

صارو يبعتو اخبار

وصور بلشو بودّو

بسرعة صار يمرق النهار

واجريي صارو يشدّو

رحت تا إنزل عالفوار

تلاقيت بللو وفِدّو

قالولي شغلك يا جار

رح منوصلك لا حَدّو

اذا مرة تانية صار

وخيروني رح اختار

بين الشغل والمشوار

هالمرة ما رح اقبل

الا مشواري ردّو

بيي الشهيد

لما استشهدت يا بيي
زيَّنو جبينك بالأرزة
عزفولك لحن الخلود
حملوك على كفوفن الأبطال
زينو نعشك بالعلم
بس أنا كنت بعدني زغير
ما شفتك ولا عرفتك
ما لحقت اندهلك بيي
ما كنت أعرف شو يعني شهادي
شو يعني موت
شو يعني حياة
شو يعني بي
شو يعني وطن
بس حسيت بدموع امي نزلت عخدي حرقتني يا بيي
كأنها بدا تخبرني شي
كأنها عم بتقللي بيك استشهد افتخر
كأنها عم بتقللي لما تكبر كون متل بيك بطل
وكبرت يا بيي
وصرت متلك جندي مكلل بالشرف والتضحية والوفاء
صرت اعرف قيمة الوطن
صرت اعرف شو يعني شرف
شو يعني ضحية
شو يعني وفاء
صرت اعرف قيمة بلادنا
صرت اعرف مين عدوي ومين صديقي
صرت افهم معنى الإستقلال وشو يعني حرية
صرت اعرف شو قيمة الشهادي
صرت اعرفك منيح يا بيي كأني بعرفك من زمان
صرت شوفك بالعلم
صرت شوفك بالأرزة
صرت شوفك بكل دمعة ام شهيد
صرت شوفك بكل نصر
صرت إسمع صوتك بالنشيد الوطني
كبرت بعيني كتير يا بيي ورح تبقى بعيوني سهران عالوطن
الوطن يلي كل حبة تراب من ارضو مجبولة بدمك
برفع راسي فيك لما بينذكر اسمك
بشوف حالي فيك لما بيسألوني انت إبن مين
بقلن بكل فخر وراس مرفوع انا ابن شهيد قدم حالو ذبيحة على مذبح الوطن تيبقى الوطن وانتو تبقو
بيي استشهد حتى انتو تعيشو وتبقى كرامتكن محفوظة.
يا بيي الشهيد انت وبالسما صليلنا.

طانيوس أندراوس
بكل فخر
ابن الشهيد البطل

بقلم
طانيوس أندراوس

بمناسبة الذكرى السنوية لرحيل الغالي مارون نهرا

مَرقِت     علينا    سنة    ما      شفناك
من    لما يا مارون    بالحزِن   ودّعناك
من    يوم    ما نزلِت    عليك    دموع
وبتوب      ملاك      الرب         كفَّنَّاك

من وقت  ما ضوَّينا  عا قبرك    شموع
مشينا    معك   وعا   كفوفنا    حملناك
من   يوم   ما    نادالك   ربنا     يسوع
غمَّضو   عيونك   وما      عدنا   لقيناك

وبعدو  على غيابك  هالقلب    موجوع
من لمّا دَق  عا بابك   القدر   وخسرناك
آخ يا ريت  لو بيرجع التاريخ    رجوع
نرجع   تشوفك   من   قبل ما    دفناك
ويرجع    صوتَك   بهالمدى     مسموع
من قبل ما سكَتت وما عدنا    سمعناك
رح نركع نصليلك ونرفع ايدينا   طلوع
انت الحبيب الغالي    يلي       حبَّيناك
ما تفكر انو  برحيلك  انتهى الموضوع
بتخلص الدني وكل العمر  وما مننساك

أنت قصيدة

أنت قصيدة كتبتها في الليالي
على صفحات القمر
وأغنية لحنتها على أنغام
صوت المطر
أنتِ رفيقتي  ...
وهبتك قلبي وروحي
عشقت جنونك
لهفتي تسافر عبر أشواقك
أعشقك...
وأعشق ذلك القدر
الذي جمعني بك
ورماني بين شِباك عشقك
حتى اصبح تاريخ ميلادي
يوم التقيت بك
لا أريد شيئاً سوى حبّكِ
فأنا أكتفي بك
ولا أكتفي منك

صبية

لبست   عا جسمها  فستانها  الشفّاف

أبيض   مهفهف    وقماشو      بيلالي

وعيونها   مكحَّلي  ومحمَّرَة   لشفاف

مرقت   من   حدّي   تتغندَر     قبالي

صرت من نظرِة عيوني عليها   خاف

يتحرَّك  شعوري  واسمح   لا    حالي

روح   لمَطرَح ما  النَظَر  غطْ  وشاف

اقْطُف     النِعْمِة   تا   طَعْمي الرَزالي

غمضت  عيوني  تا إمحي    النفناف

ويختفي  طَيْفْها  من  عقلي وخَيالي

لكن  لا    كان   نفنافها  يقبل  يختفي

ولا   كان   طيفها  يروح   من  بالي

بقلم

طانيوس أندراوس

وصفتك

اذْ      كان   بدِّك   اوصفِك           وللبِدْ

رح      ارتجِلْ       وصفِك          بموّال

واكتب     فيكي    بيوت        ما بتنعد

وأحلى    الكلام        عنك         بينقال

ورح  كون صادق معك   وإحكي   جَدْ

شو   شافت عيوني مش  من     خيالْ

رح   بلِّش بوصفِك وابتدي من    الخَدْ

واسمَحْ    لحالي  قول   شو     محتال

اَخَدْ    لونو   من   حقل    كلّو      وَرد

وزَرَعْ    الربيع     عاليمين   وعالشمال

والشَعُر  مَوج  البحر  بين  جزر    ومَدْ

ينزل  على  كتافِكْ    نهر  من     شلال

ولعيون متل  السِحر   بترمي نظرة ود

وُصِلْ    الحلى  فيها  لاحدود   الكمال

وشفاف  متل العسل  شهِدْها  بي   شِدْ

مليون   شفِّة    وشفِّة   عالشهد  تِنهالْ

والكِتِفْ   والزِنِدْ    وصابيع  كف   اليَدْ

َملمَس   حرير  ول حول  الرقبة   شال

والخَصرْ    لما  يميل    بياخد    وبيرِد

بتلحقو عيون   الكل    كيف  ما   مال

ولما  فشخاتك      عالمخطرة      بتمد

بيلبقلك   مشي الغندرة   وكتر   الدلال

جمالك    بيزيد    بين    أمس      وغد

شو   هالسر   فيكي    يا بنت    الحلال

ما   بيسوى    كتر     الحلى        هالقد

تشغلي قلوب الناس  بيهاَيْدا    الجمال

وصفتك   ورح   اترك  الك   حق   الرد

ولكل    نقد      منك      انا      مستعد

جاوبك    بيصراحة    عا    ايا    سؤال 

حوار بين شب وبنت

الشب
ليش   كل  ما عليكي طل   بتتلبكي
بيحمر وجك خجل وبتنسي  الحكي
يما      حبك      الي    هو     السبب
يما   عم تلعبي عليي لعبة    مفبركي

الصبية
كل   ما عليي  اتطل  بنسى    الكلام
بتشرد   عيوني فيك   مع     الأحلام
وبعيونك   الحلوي سحر ما     بتنلام
بتخللي   افكاري ضايعة    ومشربكي

الشب
شو   هالسحر   يلي   مخبا     بعيوني
خلاكي تنسي الكلام ومعي ما  تكوني
كيف لو عنك غبت وصرتي من  دوني
اكيد رح تنزل دموعك وتبلشي    بكي

الصبية
صعبة     يا حلو   كون   من       دونك
وصعبة     ما شوف   السحر    بعيونك
ولو غبت عني سنين والله ما    بخونك
انت الحبيب  لي  علم   قلبي   التكتكي

بحبك بكل الأحوال

بحبِّك حلى بحبِّك   جمال     
بحبِّك عيون  عشقاني

بحبِّك    غنج بحبِّك  دلال     
بحبِّك    نار     ولعاني

بحبِك حقيقة بحبِّك خيال     
بحبِّك   حلم   روحاني

بحبِّك    لَحدود     الكمال      
بحبِّك  للحب عطشاني

بحبِّك      شمس  عالتلال      
بحبِّك   قمر     سهراني

بحبِّك   قصيدة     وموّال     
بحبِّك   لحن     وغناني

بحبِّك     وطن     الاجيال     
بحبِّك   ارزة     علياني

بحبّك     علم      استقلال     
بحبِّك   جندي    لبناني

بحبِّك    تشغلي      هالبال     
بحبّك   بكل   الأحوال
حبِّك يا وطني الثاني

بمناسبة عودة شاعرة الأرز كاتيا نصره من الغربة

يا كاتيا 

رجِعتي عا باب الوطن دقُّيتي

بعيونِك شوق وبقلبِك حنين

لَ ريحِة ترابو ياما حنَّيتي

وياما كان الوطن عا غيابك حزين

هون خلقتي وهون تربَّيْتي

وشربتي الوَفا من نَبِعْ تنّورين

عطر الاصالة عا غيابو رشَّيتي

شموخِك من شموخ جبل صنين

وغير هالوطن حب ما عطيتي

لو بعد غِبتي ومرِّت عليكي سنين

مش هيك شاعرة ارز انتِ تسمَّيتي

جذورِك بتراب الأرز مغروسين

ولما ايدَيْكي عالعلم حطَّيْتي

صارو مع الأرزة بالعلم مزروعين

وياما بجمالو بأشعارك تغنَّيتي

حروفك بسما لبنان محفورين

ولما علينا رجعتي طلَّيتي

صارت دموع الفرح بالعين غرقانين

وعا أَد ما زعِلنا لما فلَيتي

عا أَد ما هلَق فيكي مبسوطين

اهلا وسهلا فيكي ببيتِك قبل بيتي

وبإذن الله هون رح نبقى سوى

نرجع متل ما كنا قبل مجتمعين

بقلم

طانيوس أندراوس

13/8/2017 

قصيدة الى النجم روي عساف أثناء مهرجان بعد سهار في عين الدلب

لما يا روي عا عين الدلب طلّيت
لبست تَوب الفن وعالمسرح غنَّيْت
صارت عيون الناس كلها تلحَقَكْ
حتى بعيون الكل وبالقلب حلَّيْت

وجودَك كان فَرَح لكل الناس
غنَّيت بصوتك الحب والإحساس
وكل ما تصرخ أوف ارفع بإيدي الكاس
وقلك آه يا روي منَّك شو حبَّيت

شو كان حلو صوتك وشو حَنون
هيك متل شي كنار وتَرْغَلِتْ حسّون
بين كل هالنجوم انتَ النَجِم بِتكون
وجَوَّكْ لِعْمِلتو كان جَوْ جنون
وشو زعلت ناس من بعد ما فلَّيت

بقلم

طانيوس أندراوس

بمناسبة عيد ميلاد زوجتي/ بقلم طانيوس أندراوس

بمناسبة عيد ميلاد زوجتي أهديها هذه القصيدة المتواضعة بأبياتها والكبيرة بمعانيها

عقبال المية سنة يا رب🙏
الله يطول بعمرك ويخليكي بصحتك وتضللي سند لعايلتك.
🎂🎂🎂🎂🎂🎂🎂🎂🎂🎂🎂🎂🎂
🌹🌹🌹🌹🌹🌹🌹🌹🌹🌹🌹🌹🌹
😘😘😘😘😘😘😘😘😘😘😘😘😘

بي عيد   ميلادك   جن  القلب  تخمين
وصار  ينده حروفي  بالحب  يتسلَّحو
وتا    يبعتلك   كلام   فَتَّحلِك  شرايين
وطلعت الكلمات منها   فيكي   يِمدَحو
وينده   الإحساس    والحب     اليقين
يرجعو   من   جديد    إذا     بيسمحو
ولما     لعندك  رماني     هوا    تشرين
حسَّيْت    قلبي    نَط   من     مطرحو
صارت    الدقات    تعد         بلملايين
وصارو   دمّاتك   بشراييني    يسرحو
وصارت   عيوني   تستحي  ومن مين
من   نظرة   عيونِك    يلي     بيدبحو
ومنِّك اخدت الحب وعطيتك   حنين
وسنيني  ببحر عمرك صارو    يسبحو
صرت   شوفك   اجمل  من الياسمين
وإسمع   فصول السنِة  فيكي يمدحو
ونسمات تلعب بشعرك شمال   ويمين
خاف  على خدودك   منها    يتجرَّحو
انت     بعيوني      حلوة      الحلوين
بشوف    القمر    انت   كل ما  المحو
ومن   بعد   ما حبيتك كل   هالسنين
وعيوني  اسئلة      صارو     يطرحو
صار    الحب    يندهلك   يا      الين
تكوني   معي   وتعيشي   كل   العمر
وقلبي  وقلبك يغمرو بعض  ويفرحو

🎂🎂🎂🎂🎂🎂🎂🎂🎂🎂🎂🎂🎂
🌹🌹🌹🌹🌹🌹🌹🌹🌹🌹🌹🌹🌹
😘😘😘😘😘😘😘😘😘😘😘😘😘

طانيوس أندراوس
                                                ٢٠١٨/١٠/٧