زهقت ومن هالدني قرفان
لا طعم الها ولا فرح فيها
قاعد لحالي والفكر تعبان
كيف بدي حياتي بعد كفيها
عم قضي العمر بالشغل شقيان
كرمال لقمت عيش اجنيها
واحمي ولادي من نقمة الحرمان
وما خلي البسمة الجوع يمحيها
صعبة تكون عايش ومش انسان
تفتش عالكرامة وما تلاقيها
وشعب ماشي ببلد مشية الخرفان
وراعي فاشل عم يرعيها
والفقر عشعش بمعدة الجوعان
لقمة خبز ما معو يشتريها
وناس بالساحات تصرخ وتنهان
وما حدا بكلمة حق يراضيها
من هالوضع هاجرو الشبان
وهوية وطن صار الكل ناسيها
يا ريت الماضي بيرجعلي الزمان
وارجع ايام العز والوفا لاقيها
يا رب مد ايدك فوق سما لبنان
وفتح عيون يلي عالوطن عميان
وارزة الرب باركها وحميها
ليست هناك تعليقات:
إرسال تعليق